برافو سلطات و منتخبي لعيون..قافلة جهة لعيون لِّي خرْجَات هاذْ صْبَاحْ فإتجاه المناطق المتضررة من الزلزال صَنْفاتْهَا الصحافة الدولية و الوطنية كأضخم قافلة على الصعيد الوطني..

الصحراء اليومية/العيون

ساكنة جهة العيون الساقية الحمراء بفاعليها المدنيين والإقتصاديين وغيرهم بعثوا برسالة زوينة من خلال القافلة الإنسانية لي خرجات اليوم في إتجاه المناطق المتضررة من الزلزال.

من غير قيم التضامن والتآزر والتلاحم والإنسانية بين مكونات الأمة المغربية، لِّي جسداتها هاد القافلة لي كانت فيها 79 شاحنة، دازت رسالة زوينة وهي التنظيم لي كان مزيان لجمع التبرعات والمساعدات على مستوى جهة العيون الساقية الحمراء، وحتى مسالة إرسالها.

ساكنة العيون وفعاليات المجتمع المدني وبتنسيق وتعاون مع السلطات المحلية نظموا هاد العملية وفقا لشروط الشفافية وفْأَماكن محددة باشْ تكون العملية منضبطة ومقننة تفاديا لأي إحتمال يمكن يوقع، بالإضافة لإرسال هاد المساعدات دقة وحدة وفمجموعة وحدة بعيد على التشتت وكل واحد يرسل وحدو ويكثر القيل والقال، وهادشي لي خصو يكون فباقي المدن المغربية.

ساكنة العيون وفعاليات المجتمع المدني والسلطات المحلية اليوم الأربعاء عطاو درس فالتنظيم، ووجهوا قافلة وحدة فيها شاحنات هازة الأغطية والافرشة والمواد الغذائية والأدوية للمناطق لي محتاجة وعبروا على وطنيتهم وخدمتهم لوطنهم بنكران ذات ومسؤولية وتنظيم محكم وكرسوا دورهم الفاعل فالبلاد من خلال عملهم بالمثل الحساني لي كيقول “حمل الجماعة ريش” بمعنى أنه بالعمل الجماعي يمكن نتغلبوا على أي شي” حتى لو كان فاجعة بحال هادي.